पूर्व राजा भन्छन मैले कर तिर्न पाइन !!!

काठमाडौं, २८ साउन

गणतन्त्र स्थापना भएको वर्ष दिन बितिसक्दा पनि नागरिकको रूपमा कर तिर्न नपाएकोमा पूर्वराजा ज्ञानेन्द्रले गुनासो गरेका छन् । महसुल र कर तिर्छु भन्दा पनि सरकारले चासो नगरेको भन्दै उनले अर्थ मन्त्रालयलाई पत्रसमेत लेखेका छन् ।

अर्थमन्त्री सुरेन्द्र पाण्डेका अनुसार ज्ञानेन्द्रले साउनको दोस्रो साता पत्र लेखेर आफूले प्रयोग गरेका विभिन्न सेवाको महसुल तथा कर स्पष्ट गरिदिन अर्थ मन्त्रालयलाई आग्रह गरेका हुन् । ज्ञानेन्द्रले आफू साधारण नेपाली नागरिक भएकोले आफ्नो घरजग्गाको कर, पानी, बिजुली र टेलिफोनको महसुल कति तिर्नुपर्ने हो स्पष्ट गरिदिन माग गरेका छन् ।

फुलस्केप पेपरमा विनासम्बोधन लेखिएको पत्र ज्ञानेन्द्रका सहयोगी रामचन्द्र सुवेदीले साउनको दोस्रो साता अर्थ मन्त्रालयको राजस्व महाशाखामा बुझाएका थिए । मन्त्रालयका अधिकारीहरूले पत्र लिएर आउने सुवेदीलाई वारेसनामा पनि ल्याउन भनेका थिए । त्यसपछि सुवेदी सम्पर्कमा नरहेको मन्त्रालयका अधिकारीहरूले बताएका छन् ।

१५ असार ०६५ मा राजाबाट नागरिक भएका ज्ञानेन्द्रले त्यही वेलादेखि नै कर र महसुल तिर्ने बताएका छन् । 'ज्ञानेन्द्रले कर तथा महसुल क्लियर गर्न चाहेका रहेछन्, पत्र अर्थ मन्त्रालयमा आएको छ,' मन्त्री पाण्डेले बुधबार अर्थ मन्त्रालयमा पत्रकारहरूसँग भने । पहिले नै करको विवरण मागेर ज्ञानेन्द्रले सहुलियतको अपेक्षा गरेको हुन सक्ने आशंका अर्थमन्त्रीले गरे । सम्बन्धित सरकारी निकायले कर र महसुल तोकेर असुलउपर गर्ने पनि उनले बताए ।

ज्ञानेन्द्रले भने कर तथा महसुलहरू तिरेर आफू सम्मानित नागरिकको हैसियतमा बस्न चाहेकोसमेत उल्लेख गरेका छन् । उनले आफू बस्दै आएको निर्मलनिवास मात्र होइन, नातेदारको घरमा रहेका टेलिफोनको विवरण पनि दिएर महसुलबारे जानकारी मागेका छन् ।

राजाको हैसियतमा लिएका टेलिफोनको महसुल गणतन्त्र आएपछि तिर्न नेपाल टेलिकमका महाप्रबन्धकलाई यसअघि नै पत्र लेखेको पनि उनले बताएका छन् । 'तर टेलिकमले महसुल उठाउन कुनै चासो देखाएन,' उनले गुनासो गरेका छन् ।

पत्रमा पूर्वराजा ज्ञानेन्द्रले निर्मलनिवास महाराजगन्जमा सात लाइन, छोरी प्रेरणाको विजयानिवास छाउनीमा पाँच लाइन, जीवनकुञ्ज महाराजगन्जमा तीन लाइन, सिताष्मा शाहीको निवासमा तीन लाइन, शोभा शाहीको निवासमा तीन लाइन टेलिफोन रहेको जानकारीसमेत दिएका छन् । पत्रमा उनले यो सबै सुविधा राजा तथा राजपरिवारको हैसियतमा लिएको पनि स्पष्ट पारेका छन् ।

ज्ञानेन्द्रले निर्मलनिवास, जीवनकुञ्ज र शोभागृहको कर तिर्न चाहेको उल्लेख गरेका छन् । शोभाको नाममा रहेको कमलादीको घर र धीरेन्द्रका छोरीहरूको नाममा रहेको जीवनकुञ्जको कर तिर्न उनीहरूले यसअघि नै महानगरपालिकामा सम्पर्क गरिसकेका छन् ।

Source : nayapatrika